ជប៉ុន៖ ទីភ្នាក់ងារ៣ស្ទាបស្ទង់ភូមិសាស្ត្រសហរដ្ឋអាមេរិក (USGS) បានបញ្ជាក់ថា គ្រោះរញ្ជួយដីកម្រិត ៧.១រ៉ិចទ័រ បានវាយប្រហារភាគខាងត្បូងប្រទេសជប៉ុននៅថ្ងៃព្រហស្បតិ៍ ទី៨ ខែសីហានេះ ខណៈទីភ្នាក់ងារ​ឧតុនិយម​ក្នុង​តំបន់​បាន​ព្រមាន​អំពី រលក​យក្ស​ស៊ូណាមិ​បាន​វាយប្រហារ​តំបន់​ឆ្នេរ​ភាគ​ខាងត្បូង​ប្រទេស​។

ទីភ្នាក់ងារអាមេរិក USGS និយាយថា គ្រោះរញ្ជួយដីនេះបានកើតឡើងនៅវេលាម៉ោង ៤ និង៤២ល្ងាច ចេញពីកោះ Kyushu ក្នុងជម្រៅប្រមាណ ២៥គីឡូម៉ែត្រ។

ពីដំបូង ទីភ្នាក់ងារ USGS បានរាយការណ៍ថាមានការរញ្ជួយដីខ្លាំងចំនួនពីរដែលមានកម្រិត ៦.៩ និង ៧.១ រិចទ័រ ប៉ុន្តែក្រោយមកបានកែតម្រូវវិញថាមានការរញ្ជួយដីកើតឡើងតែមួយលើកប៉ុណ្ណោះ។

ទីភ្នាក់ងារឧតុនិយមជប៉ុន (JMA) ក៏បានរាយការណ៍ពីការរញ្ជួយដីមួយដែលមានកម្រិត ៧.១រ៉ិចទ័រផងដែរ។ JMA បានឱ្យដឹងតាមរយៈបណ្ដាញសង្គម X ថា "រលកយក្សស៊ូណាមិអាចនឹងងវាយប្រហារផ្ទួនៗ”។ មិនត្រឹមតែប៉ុណ្ណោះក៏បានណែនាំពលរដ្ឋ សូមកុំចូលទៅក្នុងសមុទ្រ ឬចូលទៅជិតឆ្នេរសមុទ្រ រហូតដល់បញ្ចប់ការព្រមានអំពីរលកយក្សស៊ូណាមិ៕